mai fadeel
عضو محترف
نظرة سريعة للدرس الثاني
(المصادر الأولية والمصادر الثانوية)
يعني ايه يا مستر المصادر الأولية والثانوية دي
- دي يا اولاد اثار وكتب وحاجات كتير بنستفيد منها إننا نتأكد من المعلومات والأحداث بتاعت التاريخ اللي هناخدها في دروسنا زي قصة الملك مينا وقصة الملك أحمس طارد الهكسوس وحرب أكتوبر وقصص تانية كتير حصلت في تاريخ بلدنا العظيم
& طيب ممكن يا مستر تقولنا كل واحدة نعرفها إزاي
- بصوا يا أولاد
المصادر الأولية ببساطة هي اثار أو اي حاجة بنكتشفها من وقت الحدث نفسه اللي بندرسه..
& طيب ادينا مثال يا مستر
- يعني يا اولاد مثلآ لوحة نارمر اللي عملها الملك مينا تعتبر مصادر أولية لانها من ايام الملك مينا نفسه ،، و كمان النقوش والرسوم اللي على جدران المعابد تعتبر برضو مصادر أولية لأنها من وقت الأحداث نفسها بتاعت المصريين القدماء
& تمام يا مستر طيب والمصادر الثانوية
دي يا اولاد بتكون كتب او أبحاث أو مقالات بيكتبها الناس المهتمة بالتاريخ بس بعد ما الحدث حصل من مدة طوييييلة جدآ، يعني مكانوش عايشين وقت الحدث نفسه
& ادينا برضو مثال يا مستر
- يعني مثلاً حد متخصص في التاريخ يكتب في الوقت اللي احنا عايشين فيه ده كتاب عن الملك مينا ..الكتاب دا طبعا يعتبر مصادر ثانوية يا أولاد لأنه مكتوب بعد موت الملك مينا بآلاف السنين
& طيب يا مستر هل المصادر دي كلها منتشرة ونلاقيها بسهولة
- المتوفرة يا اولاد هي المصادر الثانوية ، أما المصادر الأولية مبتبقاش متوفرة كتير
& ليه يا مستر ايه الفرق
- لأن المصادر الأولية بتبقي صعب الوصول ليها لأنها من زمان جدآ زي ما قولنا من وقت الحدث نفسه زمااان ولما بيتم اكتشافها بتكون مهمة جدا جدا يا اولاد في معرفة الأحداث زمان و التأكد منها
- والمصادر الثانوية يا مستر متوفرة ومنتشرة كتير ليه
- المصادر الثانوية ميزتها أنها متوفرة ومنتشرة يا اولاد لأنها طبعاً ممكن اي باحث في اي وقت يعمل مقال أو كتاب عن الأحداث والقصص بتاعت زمان فا احنا نقدر نلاقي مصادر ثانوية كتير عكس المصادر الأولية ..اللي بيتم الوصول ليها بصعوبة جدا لأنها من زمان اوووي ، من وقت الأحداث نفسها
المادة : الدراسات الاجتماعية
الصف الدراسي : الصف الرابع الابتدائي
الفصل الدراسي : الفصل الدراسي الأول
من إعداد : الأستاذ عوني عاطف